المدونة
هل لازم تستخدمي برايمر قبل الميكب كل مرة ؟ ولا مش مهم خالص
من أكتر الأسئلة اللي بتسألها البنات قبل ما يحطوا ميكب:
“هو البرايمر خطوة أساسية ولا ممكن أستغنى عنها؟”
والإجابة الصح هي:
انه بيعتمد على نوع بشرتك، نوع الميكب، والمناسبة اللي بتحضريها.
تعالي نشرحها ببساطة:
الأول: يعني إيه برايمر أصلاً؟
البرايمر هو حاجز مابين البشة والميكاب بتحطيه قبل الفاونديشن علشان:
- يهيّأ بشرتك للميكب
- يملأ المسام الواسعة
- يثبت الميكب وقت أطول
- يعزل البشرة عن المكياج علشان يمنع امتصاصه داخل البشرة
- يخلي الفاونديشن شكله أنعم
هل لازم أستخدمه دايمًا؟ لأ
✅ استخدام البرايمر بيكون مهم في الحالات دي:
- لو عندك مسام واسعة جدًا أو ملمس غير ناعم للبشرة
→ برايمر السيلكون هنا بيعمل طبقة بتعزل سطح البشرة. - لو بشرتك دهنية وبتلمع بسرعة
→ استخدمي برايمر علشان يقلل الدهون ويثبت الميكب. - لو بتصوري أو خارجة مناسبة كبيرة
→ هيساعد الميكب يثبت ويطلع أنعم في الصور. - لو بتستخدمي فاونديشن تقيل أو فول كفر
→ البرايمر هيساعد في تحسين شكلة ومنعه من التكتل .
إمتى تقدري تستغني عن البرايمر:
- لو الميكب خفيف أو يومي، مش محتاج تثبيت قوي
- لو بشرتك ناعمة ومفيهاش مسام أو مشاكل واضحة
- لو استخدمتي مرطب فيه مكونات بتحضّر البشرة (زي نياسيناميد أو هيالورونيك آسيد )
- لو هتستخدمي ميكب خفيف أو سكين-لايت مش بيحتاج برايمر
بس خدي بالك… لو مش هتستخدمي برايمر، لازم روتينك الصباحي يكون مضبوط (ترطيب وتنظيف كويس).
وفي غلطات منتشرة مع البرايمر وبتفرق في شكل الميكب.
زي ان أغلب البنات بتحط البرايمر… وبسرعة فوقيه فاونديشن!
وده بيخلي المنتجين يختلطوا ببعض، ويبوّظوا تأثير البرايمر تمامًا.
📌 الصح؟ تستني على البرايمر شوية قبل ما تبدأي باقي الميكب.
لو البرايمر لزج أو مرطّب بزيادة، سيبيه دقيقتين علشان يتشرب.
لو خفيف أو جِل، 30–60 ثانية كفاية.
إيه اللي بيحصل لو ما استنتيش عليه؟
- الفاونديشن مش هيمسك كويس
- ممكن يزحلق أو يتكتل
- المسام هتبان أكتر
- البرايمر هيكون بلا تأثير
- والنتيجة؟ ميكب شكله مش ناعم ولا ثابت
تريكات المحترفين:
لو عايزة أقصى تثبيت، بعد البرايمر ممكن ترشي طبقة خفيفة جدًا من مثبت الميكب (Setting Spray)
وبعدها تكمّلي باقي الخطوات. الطريقة دي بتخلي الميكب يعيش بالساعات من غير ما يتحرك.
فالأخر البرايمر لو اتطبق صح واتثبت قبل الفاونديشن، بيكون عامل أساسي في:
- نعومة البشرة
- ثبات الميكب
- تقليل المسام واللمعة
- الحفاظ على شكل متناسق طول اليوم
فما تستعجليش الخطوة دي… لأنها بدايتك للوك أحترافي.
فا لو عايزة تسألي عن منتجات البرايمر المتنوعة من مايت سينما وايه الأفضل لأستخدامك ونوع بشرتك؟
كلمينا في أي وقت، وفريقنا هيساعدك توصلي للاختيار المثالي ✨